আপোনাৰ ভোট, বহুমূলীয়া নে বিনামূলীয়া?

নিৰ্বাচন খুবেই আসন্ন। মাইকত শুনিছো চাৰিওফালে ~ "ৰাইজ, আপোনালোকৰ বহুমূলীয়া ভোটটো দি **** ক জয়যুক্ত কৰক।" কিন্তু আজিৰ দিনত ভোটটোক সচাঁ‌কৈয়ে বহুমূলীয়া বুলি ক'ব পাৰি নে? জাতিৰ নামত আৱেগ, ধৰ্মৰ নামত আৱেগ, ভাষাৰ নামত আৱেগ সৃষ্টি কৰিয়েই প্ৰায় আধা ভোট সংগ্ৰহ কৰিব পাৰে এই চতুৰ দগাবাজ নেতা(?) সকলে। অলপ খোচামোদ কৰিলে হয়তো দুই চাৰিশ টকা এটা দি লৈ যাব পাৰে আপোনাৰ, মোৰ ভোটটো। নাইবা "অমুকেই জিকিব", "ভোটটো নষ্ট নকৰিব", "অমুকক দিলে কোনো লাভ নাই" ইত্যাদি ধৰণৰ কিছু মিছা Trend চলাই লৈ যাব পাৰে আপোনাৰ, মোৰ ভোটটো। গতিকে আমাৰ ভোটৰ মূল্য ক'ত থাকিল? ইয়াতে উল্লেখ্যযোগ্য এটি খুব গুৰুত্বপূৰ্ণ বিষয় এয়াই যে আমাৰ আজিৰ নেতা সকলে মানুহৰ হৃদয় জয় কৰিব নোৱাৰে। কাৰণ অলেখ অযুত নিবনুৱা চামচাৰ ভিৰ পাৰ্টি অফিচত। নেতাৰ ঘৰৰ পদূলিত, বাৰাণ্ডাত আৰু কেতিয়াবা নেতাৰ গোহালিত! যিবোৰ কাৰণত বহুতো প্ৰাণৰো আপোন বুলি ভোটটো দিয়া লোকেও নিজৰ প্ৰয়োজন নেতাৰ ওচৰত আহি ক'ব নোৱাৰে। ইয়াত ভালপোৱাৰ (?) কিছু শীতল যুদ্ধও পৰিলক্ষিত হয়। মানে এজন চামচাই যেতিয়া নেতাৰ কাষ চাপিব পৰা হয় তেতিয়া তেওঁ অন্য এজনক (যিজন চামচা নহ'বও পাৰে, হয়তো অন্য কিবা প্ৰসংগ আলোচনাও কৰিবলৈয়ে আহিছে) দেখিলেই জ্বলি পুৰি ছাই হৈ যাব ধৰে, কাৰণ চামচাগৰাকীয়ে আগন্তক জনক নিজৰ প্ৰতিদ্বন্দ্বী বুলি জ্ঞান কৰে। (ঠিক প্ৰেমিকৰ আগত নিজৰ ভালপোৱাৰ গভীৰতা বুজাবলৈ কোনোবা প্ৰেমিকাই যেনেকুৱা কৰে) । সহজ সৰল মানুহজনক বিভিন্ন প্ৰশ্ন কৰি তেওঁ ইয়ালৈ অহাৰ উদ্দেশ্য বুজিব চেষ্টা কৰে। বহুসময় প্ৰশ্ন কৰি যেতিয়া বুজিব পাৰে যে এও তেওঁৰ নিচিনাই এজন নিবনুৱা, কিছু আৰ্থিক সহায়ৰ পথ বিচাৰি আহিছে তেতিয়াই "ছাৰ ঘৰত নাই," "ছাৰৰ গা ভাল নহয়", "ৰাতি টোপনি যাব পৰা নাই", "ছাৰ খুব ব্যস্ত", " ছাৰ গা ধুবলৈ গ'ল", "ছাৰৰ সময় নাই মিটিং আছে" ইত্যাদি কৈ তাৰ পৰা ঘুৰাই দিয়ে। অথচ ছাৰে গমেই নাপায় তেওঁৰ দৰবাৰত কোন আহিল, কোন গ'ল। এয়াই ছিষ্টেম হৈ গৈছে প্ৰায় (যদিও কিছু ভোগবাদী চিন্তাধাৰা নথকা, বিলাসী জীৱন যাপন কৰা ভাল ৰাজনীতিবিদ আজিও নথকা নহয়)।

এটা অতি চতুৰ দায়সৰা মন্তব্য আজিৰ সাংসদ, বিধায়কে প্ৰায়েই দি থাকে - চৰকাৰ আমাৰ নহয়, আমাক Extra fund নিদিয়ে ইত্যাদি খুবেই চতুৰ দায়সৰা মন্তব্য। অথচ যিকোনো দলৰে নহওক কিয় প্ৰতিজন নিৰ্বাচিত সাংসদ, বিধায়কৰ বাবে আবণ্টিত হয় বহু হেজাৰ কোটি টকা। কোনেও প্ৰশ্নই নকৰে! কৰিলেও দুই চাৰি হাজাৰ টকা দি কেছ ফিনিছ কৰি দিয়ে। মনত ৰাখিব ৰাইজ, খুবেই সংকটত আমি ডুবি আছো। চাৰিওফালে হাহাকাৰ। এয়া পৰিৱৰ্তন কৰিবলৈ ওপৰৰ মিছা Trend বোৰ এৰাই চলক। যোগ্য প্ৰাৰ্থীক নিজৰ বহুমূলীয়া ভোট দিয়ক, সজাগ নাগৰিক হওক। দেশৰ দুৰ্নীতি, সাম্প্ৰদায়িকতা বিনাশ কৰক। 🙏